Pjesa më e madhe e jetës në tokë do të shkatërrohet deri në fund të shekullit!

Shkencëtari britanik për studime klimatike, Xhejms Lavlok, ka deklaruar se për shkak të temperaturave të larta disa pjesë të botës do të shndërrohen në shkretëtira dhe do të vijë deri te ngritja e nivelit të deteve që do të vërshojnë pjesët tjera. Lavlok (89), i njohur sipas teorisë së tij Gaja, sipas së cilës Toka është një lloj organizmi i gjallë, ka thënë se ndryshimet klimatike do të shkatërrojnë pjesën më të madhe të jetës në Tokë deri në fund të këtij shekulli, ndërsa njerëzimi është vonuar që të parandalojë këtë katastrofë.

“Toka gradualisht do të shndërrohet në shkretëtirë. Kjo do të ndodhë kur Sahara gradualisht të lëvizë kah Evropa. Por, kjo nuk ka të bëjë vetëm në Evropë, por e gjithë bota do të ndryshojë në këtë drejtim”, ka thënë ai. Ai ka shtuar se është e besueshme të kenë dështuar përpjekjet për të ulur emetimin e gazrave që shkaktojnë ngrohjen e planetit, si dioksid karboni. Madje, edhe nëse bota do të gjejë mënyrën për të ulur emetimin e këtyre gazrave në zero, tash është vonë që të ftohet Toka, konsideron ai. “Ky është sikur një super-tanker, nuk mund ta ndaloni vetëm duke ndalur motorin. Nëse çuditërisht do të arrini të zvogëloni dioksid karbonin, Toka nuk do të ftohej menjëherë”, ka thënë Lavlok.

Shkencëtari britanik konsideron se të gjitha forcat duhet angazhuar në krijimin e strehimeve në rajonet, të cilat do t’i shpëtojnë efekteve negative të ndryshimeve klimatike. Sipas tij, pritet të ketë thatësi të madhe dhe vdekje të njerëzve në shkallë të paparë deri më tash dhe se numri i banorëve nga rreth shtatë miliardë mund të bie në një miliard deri në fund të shekullit, pasi që njerëzit do të kenë shumë pak resurse. “Do të ketë uri të madhe dhe mungesë uji.

Popullata mund të bie deri në një miliard ose më pak”, ka thënë Lavlok. Sipas tij, deri në vitin 2040, temperaturat në qytetet evropiane gjatë verës do të rriten mesatarisht në 43 gradë Celsius, sikurse që është tash në Bagdad.

Lavlok konsideron se bota nuk është duke reaguar urgjentisht kundër problemit dhe tha se nuk duhet fajësuar atë për parashikimet e tmerrshme, pasi që edhe Agjencia e Kombeve të Bashkuara për ndryshime klimatike në raportin e vitit 2001 pat paralajmëruar se temperaturat deri në vitin 2040 dhe 2050 do të jetë shumë të larta.

Falenderojme Besen per artikullin e derguar.

Nuk ka artikuj të ngjajshëm.